Umuyobozi mukuru w’agateganyo wa Polisi ya Uganda, Maj Gen Tumusiime Katsigazi, aravuga ko afite abapolisi bamwe bataye akazi kubera inguzanyo. Katsigazi watangiye imirimo ye nka IGP ku itariki ya 4 Werurwe, nyuma y’uko amasezerano y’akazi ya Martin Ochola arangiye, avuga ko gutoroka kubera inguzanyo bituruka ku kuguza bitatekerejweho neza.
Ku wa Gatatu, Katsigazi yabitangaje ubwo yavuganaga n’abapolisi mu nama rusange ngarukamwaka yo gusohoka SACCO (SACCO Annual General Meeting) ku cyicaro gikuru cya polisi.
Maj Gen Katsigazi ati: “Inguzanyo zatumye abantu batoroka. Uraguza amafaranga, batangira gukata umushahara wawe, ukabona ko usigaranye amashilingi 100.000 gusa. Bishobora kuba umugisha niba warabiteguye. Ugomba kugira gahunda mbere yo kuguza ”.
Iyi nkuru dukesha The Independent ivuga ko SACCO yari ifite ibibazo byinshi mbere y’uko hatorwa itsinda rishya ry’ubuyobozi riyobowe na Komiseri Mukuru wa Polisi –SCP Wilson Omoding. SACCO yagiye ikura buhoro buhoro mu kuzigama no mu mutungo kuva mu 2020 igihe SCP Omoding n’itsinda rye batangiraga akazi.
Icyakora, SCP Omoding yavuze ko SACCO ikomeje guhura n’ikibazo cyo gukemura ibibazo by’inguzanyo kubera kuzigama gake no kubikuza amafaranga menshi. Ariko Katsigazi yemera ko abapolisi benshi baguza amafaranga yo gushimisha abagore cyangwa guhiganwa n’abaturanyi babo.
SCP Omoding yavuze ko nubwo umubare w’amafaranga wabikijwe wiyongereyeho gato uva kuri miliyari 30.6 mu 2022 ukagera kuri miliyari 31.7 mu 2023 bivuze ko wiyongereyeho 3,1 ku ijana, ubwiyongere bw’amafaranga bwatewe ahanini na politiki yo kubikuza neza, bigatuma abanyamuryango babasha kubona inyungu z’amafaranga bizigamye mu mwaka.
