UCL Final: Impamvu Dortmund nitsindwa na Real Madrid itahana menshi kuruta ayo yabona nitwara igikombe
UCL Final: Impamvu Dortmund nitsindwa na Real Madrid itahana menshi kuruta ayo yabona nitwara igikombe
Kuri uyu wa 01 Kamena 2024 hategerejwe umukino wa nyuma wa UEFA Champions League, uhuza Borrussia Dortmund yo mu Budage na Real Madrid yo muri Esipanye.
Nk’uko byumvikana buri kipe igeze ku mukino wa nyuma yahatanye n’amakipe menshi irayahigika kugeza igeze ku mukino wa nyuma, aho Real Madrid ishaka gutwara iki gikombe ku nshuro 15, mu gihe Dortmund yaba itwaye icya kabiri mu mateka yayo.
Uretse igikombe n’ishema, ikipe yegukanye iki gikombe gifatwa nk’igihatse ibindi bikinwa n’amakipe yo ku mugabane w’u Burayi, inaherekereshwa agera kuri miliyoni 20 z’ama-euro [miliyonoi 21.45 $] yiyongera ku yo iba yaragiye ibona uko ivuye muri buri cyiciro.
Ni mu gihe ikipe itsindiwe ku mukino wa nyuma, yo ihabwa agera kuri miliyoni 15.5 z’ama-euro [miliyoni 16.62 $] nk’iyabaye iya kabiri, nayo aza yiyongera ku yo iba yaragiye ibona muri buri cyiciro.
N’ubwo buri kipe yifuza gutwara iki gikombe ndetse no kwegukana ibyo bihembo, Borrussia Dortmund iramutse itsindiwe kuri uwo mukino wa nyuma na Real Madrid, yabona amafaranga menshi ugereranyije n’ayo yabona itsinze igatwara igikombe.
Uti “gute rero?”, ibi biraturuka ku masezerano y’ubugure iyi kipe yagiranye na Real Madrid ubwo yaguraga Jude Bellingham mu ntangiriro z’uyu mwaka w’imikino, nk’uko byatangajwe n’ikinyamakuru Bild cyo mu Budage.
Uretse miliyoni £88.5 iyi kipe yamutanzeho rugikubita, mu masezerano harimo ko uyu mukinnyi naramuka atwaye UEFA Champions League, Real Madrid izongera Dortmund agera kuri miliyoni 5 z’ama-euro, n’andi miliyoni 2 z’ama-euro mu gihe yashyirwa mu ikipe y’umwaka y’irushanwa.
Ibyo bisobanuye ko Borrussia Dortmund niramuka itsindiwe ku mukino wa nyuma na Real Madrid yaguze Jude Bellingham, itahana agera kuri miliyoni 22.5 z’ama-euro, mu gihe iramutse itwaye igikombe yahabwa miliyoni 20 z’ama-euro gusa.
Jude Bellingham, mbere yo guhura n’ikipe yahoze akinira yavuze ko ari umukino uri bube uri ku rwego rwo hejuru kandi ko yiteguye gukora iyo bwabaga kugira ngo ikipe ye itahukane intsinzi cyane ko ngo ikipe yose yageze ku mukino wa nyuma yari ibikwiriye.
