Iyi nama yayobowe na Perezida wa RDC, Félix Tshisekedi, yitabiriwe n’abarimo Minisitiri w’Ingabo, Jean Pierre Bemba, abasirikare bakuru hamwe n’abapolisi bakuru, kuri uyu wa 5 Gashyantare 2024.

Ni mu gihe kuva mu mpera z’icyumweru gishize, umutwe witwaje intwaro wa M23 wafashe agace ka Shasha kegereye ikiyaga cya Kivu; ibyatumye umuhanda munini uhuza Goma, Sake na Minova ufungwa.

Ifungwa ry’uyu muhanda risa n’iryashyize Goma mu bihe bidasanzwe kuko indi ihuza uyu mujyi n’utundi duce tw’ingenzi muri Kivu y’Amajyaruguru na yo yarafunzwe bitewe n’imirwano imaze igihe ibera muri iyi ntara.

Muri iyi nama nkuru ya gisirikare, Minisitiri Bemba, yasobanuye uko umutekano muri Kivu y’Amajyaruguru uhagaze, yongeraho ko ingabo za RDC ziri gukora ibishoboka kugira ngo M23 idafata umujyi wa Goma.

Yagize ati “Inama nkuru y’igisirikare yahaye ubutumwa abaturage bose ko hari gukorwa ibishoboka byose kugira ngo umujyi wa Goma udafatwa. Igisirikare kandi kiri gukora ibishoboka kugira ngo cyisubize ibice byafashwe.”

Bemba yamenyesheje abitabiriye iyi nama ko mu gisirikare no mu zindi nzego zishinzwe umutekano harimo abagambanyi, aboneraho gusaba ko bazajya bahabwa ibihano biremereye kurusha ibindi.

Uyu muyobozi yitakanye abakoresha imbuga nkoranyambaga bagaragaza ko ingabo za RDC ziri gutsindwa urugamba, avuga ko ari ibinyoma bigamije gutera Abanye-Congo ubwoba no guhangayika.

Yagize ati “Ni ngombwa kwitondera imbuga nkoranyambaga zibiba ubwoba n’urucantege. Mwitonde, ntabwo ari ukuri. Igisirikare cya Congo kiri gukora akazi kadasanzwe.”

Minisitiri Bemba atangaje aya magambo nyuma y’aho mu nama y’abaminisitiri yabaye tariki ya 2 Gashyantare 2024 amenyesheje Tshisekedi ko M23 itari kunyeganyezwa n’imbaraga ingabo za RDC ziri gukoresha mu kuyirwanya.

Bemba yitakanye imbuga nkoranyambaga zigaragaza intege nke z'ingabo za RDC