Polisi y’Igihugu cy’u Rwanda (RNP) ku wa 15 Werurwe yagiranye inama n’abayobozi b’amakoperative y’abakora tagisi moto, mu rwego rwo gukomeza gahunda y’umutekano wo mu muhanda wa “Gerayo Amahoro” , kugira ngo bakemure ibibazo by’ingutu bitera Impanuka zitwara ubuzima zibera mu muhanda.
Abatwara tagisi moto ni bamwe mu bagaragaye mu bahura n’izo mpanuka zo mu muhanda kurusha abandi, kandi bari mu bazitera. Mu mpanuka 89 zo mu muhanda zabaruwe hagati ya Mutarama na Gashyantare uyu mwaka, 16 muri zo zatewe n’abatwara moto bitwaye nabi.
Ibyo byahitanye abantu 19, barimo abatwara tagisi moto 10, abagenzi batandatu n’abanyamaguru batatu.
Amapikipiki agera kuri 194 na yo yafunzwe azira kubura ubwishingizi bwa moto, abandi 94 nta ruhushya rwo gutwara bafite; Motos 12, zahinduye nimero ya plaque kugira ngo bajijishe kamera zishinzwe umutekano wo mu muhanda cyangwa kugira ngo ntibamenyekane, mu gihe habaye amakosa yo mu muhanda; Abakora tagisi moto 212 bafashwe bazira gutwara basinze, mu gihe abandi 50 basanze batwara abagenzi n’imizigo minini.
Ibindi binyuranyije n’amategeko yo mu muhanda abamotari bagiramo uruhare mu mpanuka zihitana abantu harimo umuvuduko ukabije, kunyura mu nzira mbi cyangwa, kubangamira inzira nyabagendwa, kudacana amatara kimwe n’umunaniro ukomoka ku gukora amasaha menshi, rimwe na rimwe amanywa n’ijoro.
Komiseri wa Polisi (CP) George Rumanzi, Komiseri ushinzwe ibikorwa n’umutekano rusange, yavuze ko gutwara moto bigira uruhare mu iterambere ry’umuryango n’igihugu, ariko bigomba gukorwa mu buryo bunoze kandi hakurikijwe amategeko y’umutekano wo mu muhanda.
Ati: “Dukeneye abakora tagisi moto babigize umwuga bafite disipuline ntarengwa, kandi bagaragaza imyitwarire ishyira imbere umutekano nk’umuco”. Yabasabye gukurikirana abanyamuryango babo, no gukorana na Polisi kurwanya abatwara tagisi moto mu buryo butemewe.
