Pogba ukinira Juventus de Turin bamupimye nyuma y’umukino wa mbere wa shampiyona ikipe ye yakinnye na Udinese mu kwa munani umwaka ushize.

Umushinjacyaha w’ishami rirwanya ibiyobyabwenge mu bakinnyi mu Butaliyani niwe wamusabiye guhanwa, igihano cyemejwe uyu munsi, nk’uko bivugwa n’ikinyamakuru La Republica cyo mu Butaliyani.

Inzobere ziravuga ko Pogba - uzagira imyaka 31 mu kwezi gutaha - ibyo gukina umupira w’amaguru nk’uwabigize umwuga ubu bishobora kuba birangiye kuri we.

Pogba ubu afite imyaka 30 y’amavuko, azongera kwemererwa gukina afite 34 muri 2028.

Nyuma yo kunyura mu ishuri rya United, Pogba yerekeje muri Juventus ku buntu mu mwaka wa 2012 maze atwara ibikombe bine bya Serie A byikurikiranya.

Ibi byemeje amashitani atukura amugarura kuri Old Trafford mu mwaka wa 2016 kuri miliyoni 89 z’ama pound.

Nyuma y’imyaka ibiri, Pogba yegukanye igikombe cyisi n’Ubufaransa, atsinda igitego ku mukino wa nyuma bakinnye na Croatia, ariko agorwa no kugera ku ntera yo hejuru muri United.

Mu myaka itandatu yamaze agarutse mu Bwongereza, Pogba yegukanye igikombe cya Europa League na Carabao Cup na United, ariko ananirwa kuyihesha igikombe cya Premier League.

Yavuye muri United ku buntu ku nshuro ya kabiri mu 2022 asubira muri Juventus kuko yari afite intego yo kuzura umwuga we.

Pogba yabanje mu kibuga umukino umwe muri Juventus hanyuma ahita avunika amara umwaka w’imikino wose adakina.

Yabanje ku ntebe y’abasimbura ku mukino wabo wo gufungura umwaka w’imikino 2023-24, ariko ntiyakoreshejwe batsinda 3-0 Udinese.

Nyuma y’uwo mukino, yakoze ikizamini cyatumye ahagarikwa imyaka ine kubera gukoresha ibiyobyabwenge.