Meteo Rwanda yateguje abaturarwanda umuyaga ukabije byumwihariko abatuye mu turere umunani
Ikigo gishinzwe iteganyagihe mu Rwanda cyatanze umuburo w’uko uturere umunani dushobora guhura n’umuyaga ukaze mu minsi itatu iri imbere.
Nk’uko iki kigo kibitangaza, ngo biteganijwe ko umuvuduko w’umuyaga uri hagati ya metero umunani na 12 ku isegonda utegerejwe mu bice byinshi bya Musanze, Burera, Gisagara, Huye, Nyanza, ibice bya Muhanga, mu majyaruguru y’iburengerazuba bwa Kamonyi, no mu majyaruguru y’iburengerazuba bwa Gatsibo.
Byongeye kandi, hateganijwe umuvuduko ukabije w’umuyaga uri hagati ya metero enye n’esheshatu ku isegonda mu mujyi wa Kigali, Kirehe, Kayonza, mu majyaruguru ya Nyagatare, na Gakenke, n’ahandi.
Ahasigaye mu gihugu biteganijwe ko bazahura n’umuyaga uciriritse kugeza ku ukomeye uri hagati ya metero esheshatu n’umunani ku isegonda.
Iteganyagihe ry’imvura ryerekana kugwa gutandukanye mu turere dutandukanye. Imvura nyinshi iri hagati ya milimetero 130 na 160, iteganijwe mu turere twegereye Parike ya Nyungwe mu burasirazuba bwa Rusizi, uburengerazuba bwa Nyaruguru, no mu majyepfo ya Nyamagabe.
Utundi turere nka Rubavu, Nyabihu, Musanze, Burera, n’utundi, hashobora kugwa imvura iri hagati ya milimetero 80 na 100. Hagati aho, mu burasirazuba bw’uturere twa Nyagatare, Gatsibo, na Kayonza biteganijwe ko hazagwa imvura nkeya, iri hagati ya milimetero 20 na 40.
Ibyago byibasiye uturere twinshi kubera ibihe bibi. Ku itariki ya 15 Gashyantare 2024, inkuba yakubise abantu batandatu basengaga ku musozi wa Buzinganjwiri mu Murenge wa Coko mu Karere ka Gakenke, bane muri bo barapfa.
