Jean Pierre Bemba wari Minisitiri w'ingabo za Congo, yakuwe kuri uyu mwanya
Perezida wa RD Congo, Felix Antoine Tshisekedi, yakoze impinduka muri Guverinoma, aho yashyizeho Guverinoma nshya ya ya Congo igizwe n’abaminisitiri 54 barimo abagore 17.
Izi mpinduka zakozwe kuri uyu wa kabiri tariki ya 28 Gicurasi 2024, bikaba byatangajwe mu rukerera rwo kuri uyu wa Gatatu kuri televiziyo y’igihugu n’umuvugizi wa perezida Tina Salama.
Ubusanzwe Guverinoma yari igizwe n’abaminisitiri 57. Iyi guverinoma nshya ikuriwe na Minisitiri w’Intebe wa mbere w’umugore kuva iki gihugu cyabona ubwigenge, Judith Suminwa wari usanzwe kuri uyu mwanya.
Tshisekedi yagize kandi Kabongo Mwadiamvita Minisitiri w’Ingabo asimbuye Jean Pierre Bemba wagizwe minisitiri w’ubwikorezi.
Abandi bashyizwe muri guverinoma harimo Jacquemain Shabani wagizwe Minisitiri w’ubutegetsi bw’igihugu asimbuye Peter Kazadi Guy, Julien Paluku wigeze kuyobora Intara ya Kivu ya Ruguru nawe yagizwe Minisitiri w’ubucuruzi bwo hanze.
Patrick Muyaya yagumye muri guverinoma ku mwanya yari asanzwemo nka Minisitiri w’itangazamakuru n’umuvigizi wa leta.
Thérèse Kayikwamba yagizwe Minisitiri w’ububanyi n’amahanga asimbuye Christophe Lutundula. Didier Budimbu yagizwe Minisitiri w’imikino n’imyidagaduro asimbuye Claude-François Kabulo Mwana Kabulo.
Constant Mutamba yagizwe Minisitiri w’ubutabera asimbuye Rose Mutombo Kiesse.
Yolande Elebe Ma Ndembo nawe yagizwe minisitiri w’umuco asimbuye Catherine Kathungu Furaha.Mutamba yiyita “umukuru w’uruhande rutavugarumwe n’ubutegetsi”, yatsinzwe amatora aheruka ya perezida aba mu ba mbere bemeye ko Tshisekedi yatsinze.
Abagize Inteko Ishingamategeko ni bo bagomba kwemeza iyi guverinoma nshya yashyizweho, mu gihe igisirikare cya Leta gihanganye bikomeye na M23.
