Ikipe y'igihugu ya Cote D'Ivoire yatsinze DR Congo mu mukino wa 1/2 ihita yerekeza ku mukino wa nyuma w'igikombe cy'Afurika cya 2023 Kiri kubera muri Cote D'Ivoire n'ubundi.
Uyu mukino wabaye kuri uyu Wagatatu Saa yine z'ijoro ubera kuri Stade Alassane Ouattara.
Ikipe y'igihugu ya DR Congo yatangiye umukino iri hejuru ndetse yewe ku munota wa 8 gusa Cedric Bakambu yatsinze igitego ariko umusifuzi acyanga avuga ko yari yabanje gukura umupira mu biganza by'umunyezamu wa Cote D'Ivoire.
Ku munota wa 18 ikipe y'igihugu ya Cote D'Ivoire nayo yabonye uburyo bwari buvuyemo igitego ku mupira waruhinduwe na Seko Fofana maze Simon Adingira ashyiraho umutwe ariko uragenda unyura impande y'izamu gato cyane.
Cote D'Ivoire yakomeje gukina yiharira umupira ariko kuba yawubyaza umusaruro ngo itsinze igitego bikagorana.
Ku munota wa 41 Franck Kessie yaratsinze igitego habura gato ku ishoti yararekuye ariko riragenda rikubita igiti cy'izamu biza no gutuma igice cya mbere kirangira bikiri 0-0.
Mu gice cya Kabiri ikipe y'igihugu ya DR Congo yaje ihindura abintu isatira abakinnyi nka Cedric Bakambu bashaka uko batsinda igitego.
Ku munota wa 65 Cote D'Ivoire yaje kubona igitego cya 1 gitsinzwe na Sebastien Haller ku mupira waruzamuwe na Max Gradel.
Nyuma yo gutsindwa igitego,ikipe y'igihugu ya DR Congo yabuze mu mukino burundu ubona ko kwishyura biri bugorane.
Umukino warangiye Cote D'Ivoire itsinze igitego 1-0 ndetse ihita ikatisha itike yerekeza ku mukino wa nyuma uzakinwa ku Cyumweru taliki 11 icakirana na Nigeria yo yasezereye Afurika y'Epfo.
